ئەمڕۆ سێشەم، ١٩ی ئازاری ٢٠٢٤، شاندێکی باڵای پارتی کە پێکهاتوون لە هەریەک لە مەحموود محەمەد، کەمال کەرکووک و پشتیوان سادق ئەندامانی مەکتەبی سیاسی حزبەکە، سەردانی مەکۆی هەولێری بزووتنەوەی گۆڕانیان کرد و لەلایەن بەرپرسانی هەولێری گۆڕانەوە پێشوازی کران.
چاوەڕوان دەکرێت، هەردوو حزب قسە و باس لەسەر چەند پرسێکی پێوەست بە هەڵبژاردنی خولی شەشەمی پەرلەمانی کوردستان و دۆخی ناوخۆیی هەرێم و پێوەندییەکان لەگەڵ عێراق بکەن.
سەردانی شاندی پارتی بۆ لای بزووتنەوەی گۆڕان لەکاتێکدا دێت، کە دوێنی دووشەم، ١٨ی ئازاری ٢٠٢٤، مەکتەبی سیاسی پارتی ڕاگەیەندراوێکی بڵاوکردەوە و ڕایگەیاند: ” لە بەرژەوەندی گەل و نیشتمانەکەمانی دەزانین كە پارتیمان نەچێتە ژێر باری پەسەندکردنی بریاری نادەستوریی و بەشداری هەڵبژاردنێک نەكات کە بە نایاسایی و نادەستوری و لەسایەی سیستەمێکی سەپێنراودا بەڕێوەبچێت”.
ڕاگەیەندراوەکەی مەکتەبی سیاسی پارتی، کۆمەڵێک کاردانەوەی لە ئاستی ناوخۆی هەرێمی کوردستان و عێراق و ئەمریکا بەدوای خۆیدا هێناوە.
