بەگوێرەی نووسراوێکی وەزارەتی تەندروستی حکوومەتی هەرێمی کوردستان کە لە ١٥ی نیسانی ٢٠٢٤، ئاڕاستەی تەواوی بەڕێوەبەرایەتییە گشتییەکانی تەندروستی پارێزگاکان و ئیدارە سەربەخۆکان کراوە و واژۆی سامان بەرزنجی وەزیری تەندروستی لەسەر هاتووە، ئاماژەی بە ساختەبوونی شیری وشکی نیوتری هۆڵەند (NutriHolland) کردووە، کە یەکێک لە شیرە وشکەکانی منداڵانە و لە بازاڕەکانی هەرێمی کوردستاندا بەربڵاوە.
بەگوێرەی نووسراوەکەی وەزارەتی تەندروستی، بەڵگەنامەی شیکردنەوەی شیرە وشکەکە لەلایەن کۆمپانیایەکی تایبەتەوە کراوە و ئاڕاستەی وەزارەتی تەندروستی کراوە و دەریدەخات شیرەکە ساختەیە.
هەر لەهەمان نووسراودا، وەزارەتی تەندروستی داوای کردووە، بەزووترین کات کاری پێویست ئەنجام بدرێت بەهەماهەنگیکردن لەگەڵ لێژنە هاوبەشەکانی قایمقامیەتەکان بەمەبەستی داخستنی سەرجەم کۆگاکانی کۆمپانیای تایبەت بە شیرە وشکەکە و هەروەها کۆکردنەوە و دەستبەسەرداگرتنی گشت جۆرەکانی شیری نیوتری هۆڵەند لە بازاڕەکانی هەرێمی کوردستان.
