دەزگای ئاسایشی هەرێم، دەست بەسەر کارگەیەکی پێکەوەنانی ئۆتۆمبێلی بێسەرەتا و بڕاوە دەگرێت و دەستگیرکردنی (١٠) تۆمەتباریش ڕادەگەیەنێت.
بەڕێوەبەرایەتی گشتی ئاسایش-سلێمانی ڕایگەیاند، دوای بەدواداچوون و چاودێری ورد، لەلایەن بەڕێوەبەرایەتی ئاسایشی ڕۆژئاوای سلێمانییەوە، ڕۆژی ٢ی حوزەیرانی ٢٠٢٤، بەهەماهەنگی بەڕێوەبەرایەتی بازگەکان، لەناوچەی (چیمەن)ی نزیک شاری کەرکووک، دەستیان بەسەر کارگەیەکی پێکەوەنان و لەحیمکردنەوەی ئۆتۆمبێلی بڕاوە و بێسەرەتادا گرتووە.
بەپێی ڕاگەیەندراوی ئاسایش، ١٧ ئۆتۆمبێلی بێسەرەتا و بڕاوە، لە کارگەکەدا هەبوون، کە بە ڕێگەی نایاسایی لە شاری بەسڕەوە هێنراون و تۆمەتباران بەنیازبوون دوای پێکەوەنانی ئۆتۆمبێلەکان لە کوردستان ساخیان بکەنەوە.
بەڕێوەبەرایەتی گشتی ئاسایشی سلێمانی، ئاشکرای کردووە، بەبڕیاری دادوەری لێکۆڵینەوەی ئاسایش ١٠ تۆمەتبار لەو کارگەیەدا دەستگیر کراون و ئێستا بەماددەی ٢٤٠ لەیاسای سزادان ڕاگیراون و لێکۆڵینەوە لە دۆسیەکانیان دەکرێت.
