دەقی پەیامەکە:
یادی شەست و سێ ساڵه‌ی دامەزراندنی یەکێتیی مامۆستایانی کوردستان لە هەموو مامۆستایانی خۆشەویستی کوردستان و سکرتارییەتی یەکێتیی مامۆستایان پیرۆز دەکەم، هیوای سەرکەوتن و پێشکەوتنی بەردەوامیان بۆ دەخوازم.
پەیامی بەرز و ڕۆڵی مامۆستایان لە پێگەیاندنی نەوەکان بەرز دەنرخێنین و هه‌موو هه‌وڵێك له‌پێناو دابینكردنی ژیانێکی شایستە بۆ ئه‌وان ده‌ده‌ین کە لەگەڵ پێگەی پەروەردەیی و نیشتمانییاندا بگونجێت. به‌رده‌وام ده‌بین له كاركردن بۆ دابینکردنی ژینگەیەکی فێرکردنی گونجاو و هاوچەرخ كه وەبەرهێنانێکی ڕاستەوخۆیە لە داهاتووی کوردستاندا.
مامۆستایان پێشه‌نگ و کۆڵەکەی سەرەکیی بنیاتنانی کۆمەڵگەن و گەرەنتیی پەروەردەکردنی مرۆڤی هۆشیارن كه شانازی به ناسنامه‌كه‌یانه‌وه دەکەن. لە هەموو قۆناغەکاندا دڵسۆزییان سەلماندووە، هه‌ر لە گۆڕەپانەکانی خەباته‌وه تا هۆڵه‌كانی خوێندن، هەمیشە پارێزەری هۆشیاری و زمان و بەهاکان بوون. ڕۆڵیان لە بەردەوامیی پرۆسه‌ی فێرکردن لە سەختترین هەلومەرجدا، جێی ڕێز و پێزانینه.
ده‌ستخۆشی له یەکێتیی مامۆستایانی کوردستان دەکەین بۆ نوێنەرایەتیکردنی توێژی مامۆستایان و بەرگریکردن لە مافەکانیان. بە ڕێزەوە قوربانیدانی ئەو مامۆستایانە بەبیر دێنینەوە کە گیانیان لەپێناو ئازادیدا به‌خشی. سڵاو بۆ هەموو ئه‌و مامۆستایانه‌ی به دڵسۆزی و له‌خۆبوردوویی ئەرکی پیرۆزیان جێبەجێ دەکه‌ن.
نێچیرڤان بارزانی
سەرۆکی هەرێمی کوردستان
