بزووتنەوەی گۆڕان لە ڕاگەیەندراوێکدا دەڵێ، بڕیاری ڕاگرتنی شایستە داراییەکانی هەرێمی کوردستان لەلایەن وەزارەتی دارایی حکوومەتی ئیتحادییەوە؛ پێشێلکردنی ئاشکرای دەستووری عێراق و پێنەدانی مافە داراییەکانی مووچەخۆرانی هەرێمی کوردستانە.
لە بەشێکی دیکەی ڕاگەیەندراوەکەدا هاتووە: ئێمە لە بزووتنەوەی گۆڕان، سەرەڕای پشتیوانیکردنی مافە سەرەتاییەکانی فەرمانبەرانی هەرێم، داوا دەکەین، چیتر لەنێوان بەرداشی کێشە سیاسییەکانی حکوومەتی ئیتحادی و حکوومەتی هەرێم قووتی خەڵکی کوردستان نەهاڕدرێت.
ئەوەش هاتووە: هاوکات، داوا دەکەین هەر کێشەیەک هەیە؛ پێویستە لەسەر بنچینەی دەستووری عێراقی و یاسا بەرکارەکان چارەسەر بکرێت، نەک بە برسیکردنی چینی مامناوەند و مووچەخۆران تەواو بێت.
