لە هێرشە درۆنییەکەی سورداش سێ پێشمەرگەی کۆمەڵە بریندار بوون

کۆمەڵەی زەحمەتکێشانی کوردستان، ئەمڕۆ سێشەم ١٤ی نیسانی ٢٠٢٦، ڕاگەیەندراوێکی لەمەڕ هێرشی درۆنی بۆ سەر یەکێک لە ئۆردوگاکانی کۆمەڵە بڵاوکردەوە.

بەگوێرەی ڕاگەیەندراوەکە، هێرشەکە لەلایەن ڕژێمی ئیسلامی ئێران و بە ڕێگەی درۆنی بۆمبڕێژکراوەوە ئەنجامدراوە.

لە ڕاگەیەندراوەکەدا هاتووە: “لە ئەنجامی ئەم هێرشە، بەداخەوە سێ پێشمەرگە بریندار بوون، کە باری تەندروستی یەکێک لەوان ناجێگیرە”.

کۆمەڵەی زەحمەتکێشانی کوردستان دەڵێ: “ئەم جۆرە هێرش و پەلامارانە، چ ئێستا و چ پێشووتر، نیشانەی ترس و وەحشەتی کۆماری ئیسلامییە بەرانبەر بە ئیرادەی بەهێز و ویستی نەگۆڕی خەڵکی کوردستان”.

زیاتر دەڵێ: “کۆمەڵە پێ لەسەر ئەوە دائەگرێت کە ئەم جۆرە کردارە هەرگیز ناتوانێت لە عەزمی تێکۆشان و داخوازە ڕەواکانی خەڵکی کورد کەم بکاتەوە، بەڵکو زیاتر هۆکاری بەهێزبوون، یەکگرتوویی و بەردەوامی لە تێکۆشان دەبێت.”