زێدپرێس
ئەمڕۆ شەمە ٥ی ئابی ٢٠٢٣، وەزارەتی تەندروستی، ڕای گەیاند، پاڵپشت بە ڕاسپاردە و بڕیاری لێژنەی لێکۆڵینەوە بە چاودێری سەرۆکایەتی داواکاری گشتی، بەهۆکاری بوونی دەرمانی قاچاخ و نایاسایی و بێ سەرچاوە، چوار دەرمانخانە لە شاری هەولێر داخران بە ڕاگرتنی کاری پیشەی دەرمانسازی بۆ ماوەی شەش مانگ.
بەپێی ڕاگەیەنراوی وەزارەتی تەندروستی دەرمانخانەکان پێکدێن لە:
- دەرمانخانەی ئەمیر
- دەرمانخانەی بیمار
- دەرمانخانەی هاوس فارما
- دەرمانخانەی پەخشان
لەبەشێکی دیکەی ڕاگەیەنراوەکەدا هاتووە، وەزارەتی تەندروستی/ بەڕێوەبەرایەتی کۆنتڕۆڵی جۆری دەرمان و پێداویستی پزیشکی KMCA هاووڵاتیان دڵنیا دەکاتەوە لە بەردەوامی چاودێریکردنی دەرمان و پێداویستی پزیشکی لە پێناو سەلامەتی نەخۆش و ڕێگەگرتن لە هەر دەرمانێکی نایاسایی و نافەرمی و دوور لە پەسەندکراوی کۆنتڕۆڵی جۆری دەرمان.
زیاتر دەڵێ “هاووڵاتیانی خۆشەویست ئاگاداردەکەینەوە کەوا دووربن لە بەکارهێنانی دەرمانی بێ سەرچاوە و بێ ستیکەر، هەروەها لە ڕێگەی هێڵە گەرمەکانی پەیوەندیکردن تیمەکانی چاودێری بازاڕی لێ ئاگادار بکەنەوە بۆ وەرگرتنی سکاڵا و گرتنەبەری ڕێکار و سزای یاسایی لەبەرانبەر هەر سەرپێچی و کەمتەرخەمییەک”.
