زێدپرێس
ئاگرێک لە سنوری گوندەکانی (زەید عومەر و داری زاین) سەر بە شارۆچکەی قەرەداغ کەوتەوە و بووە هۆی سوتاندنی نزیکەی ٣٠٠ دۆنم پوش و پاوان و دارستانی سروشتی.
ئەمڕۆ یەکشەم ٦ی ئابی ٢٠٢٣، بەڕێوەبەرایەتی پۆلیسی دارستان و ژینگەی پارێزگای سلێمانی، وردەکارییەکانی ڕووداوێکی ئاگرکەوتنەوەی لە سنووری گوندەکانی زەید عومەر و داری زین سەر بە شارۆچکەی قەرەداغ خستەڕوو.
ئاگرەکە شەوی ٥/٦ی ئابی ٢٠٢٣، کەوتووتەوە و دەستبەجێ مەفرەزەیەکی بەشی پۆلیسی دارستانی قەرەداغ گەیشتوونەتە شوێنی ڕووداوەکە و بە هاوکاری هاووڵاتیانی سنورەکە و بە ماوەی سێ کاتژمێر، ئاگرەکەیان کۆنتڕۆڵ کردووە.
پۆلیسی دارستان و ژینگە، ئاماژەی بەوە کردووە، تا ئێستا هۆکاری ئاگرکەوتنەوەکە دیار نییە و پەڕاوی لێکۆڵینەوەی بۆ ڕێکخراوە، بەمەستی ئەنجامدانی ڕێکاری یاسایی .
هەر بەرەبەیانی ئەمڕۆ یەکشەم، ڕووداوێکی دیکەی ئاگرکەوتنەوە لە سنووری بازیان ڕوویدا و بەپێی پۆلیسی ژینگە و دارستان بووەتە هۆی سووتانی نزیکەی ٣٠ دۆنم لە پوش و پاوان و پەرێزی جووتیاران و لە ئەنجامی کوژاندنەوە و کۆنترۆڵکردنی ئاگرەکەشدا، کارمەندێکی پۆلیسی دارستان و ژینگە بریندار بووە.
