زێدپرێس
ئەمڕۆ چوارشەم ٣٠ی ئابی ٢٠٢٣، حزبی شیوعی کوردستان، بەناوی مەڵبەندی کەرکووکی حزبەکەوە، ڕاگەیەنراوێکی لەمەڕ داخستنی ڕێگای کەرکووک-هەولێر بڵاوکردەوە.
لە ڕاگەیەنراوەکەدا وێڕای پێداگیری لەسەر دەستبەجێ کردنەوەی ڕێگاکە، ئەوەش هاتووە، کە داخستنی ڕێگاکە، هەر ئێستا بووەتە هۆی پەکخستنی بازاڕ و کار و کەسابەتی کاسبکاران و دواکەوتنی فەرمانبەران لە ئەرکەکانیان و دواکەوتن و ڕایی نەکردنی مامەڵە و کاروباری هاووڵاتیان و لەدەستچوونی تاقیکردنەوەکانی خولی دووەمی قوتابیان.
دەقی ڕاگەیەنراوەکە:
ڕاگەیەندراوێک لە مەڵبەندی کەرکووکی حزبی شیوعی کوردستانەوە
ماوەی سێ ڕۆژە پێشهاتێکی نەخوازراو هاتۆتە پێشەوە و پێویستە بەر لەتەشەنەکردنی بەئاڕاستەیەکی خراپتر کۆتایی پێبهێنرێت.
داخستنی ڕێگای هاتوچۆی نێوان کەرکووک و هەولێر، هیچ پاساوێک هەڵناگرێت و پێویستە دەستبەجێ ڕێگاکە بکرێتەوە، چونکە بۆتە هۆکاری پەکخستنی بازاڕ و کار و کەسابەتی کاسبکاران و دواکەوتنی فەرمانبەران لە ئەرکەکانیان و دواکەوتن و ڕایی نەکردنی مامەڵە و کاروباری هاووڵاتیان و لەدەستچوونی تاقیکردنەوەکانی خولی دووەمی قوتابیان.
درێژەکێشانی ئەم پێشهاتە و چارەسەرنەکردنی دەستبەجێی، مەترسی پەرچەکردار و تێکدانی ئاشتی کۆمەڵایەتی لێدەکەوێتەوە.
بۆیە داوا لە ئیدارەی پارێزگای کەرکووک و هێزە ئەمنییەکان دەکەین بەپەلە ئەرکی خۆیان جێبەجێ بکەن لەمەڕ پاراستنی دۆخی ئەمنی شارەکە و ئەو پێکەوەژیانەی مێژوویەکی دوورودرێژی هەیه لە نێوان پێکهاتە جیاجیاکانی شارەکەمان.
حزبی شیوعی کوردستان
مەڵبەندی کەرکووک
٣٠ی ئابی ٢٠٢٣
