زێدپرێس
بەهۆی کەوتنەوەی ئاگرێک لە سنووری چەند گوندێکی سەر بە شارەدێی بەرزنجە، نزیکەی ٥٠٠ دۆنم پاوان و دارستانی سروشتی سوتا.
ئەمڕۆ یەکشەم ٣ی ئەیلوولی ٢٠٢٣، بەڕێوەبەرایەتی پۆلیسی دارستان و ژینگەی سلێمانی ڕایگەیاند، ئاگرێك لە سنوری گوندەکانی (بیوەك، زڵزڵە و چنارە)ی سەر بە شارەدێی بەرزنجە کەوتەوە و بووە هۆی سوتانی نزیکەی ٥٠٠ دۆنم پوش و پاوان و داری سروشتی.
پۆلیسی دارستان دەڵێ، لەگەڵ بیستنی هەواڵەکە کارمەندانی بنکەی پۆلیسی دارستانی بەرزنجە دەرچوون بۆ شوێنی دیاریکراو و بە هاوکاری خەڵکی گوندەکان توانیان بە ماوەی هەشت کاتژمێر ئاگرەکە کۆنتڕۆڵ بکەن.
بەگوێرەی پۆلیسی دارستان و ژینگەی سلێمانی، هۆکاری ئاگرەکە نادیارە و لێکۆڵینەوە و بەدواداچوون لەوبارەیەوە بەردەوامە .
