زێدپرێس
هەڵەدنی ئەندامی پێشووی پەرلەمانی کوردستان و سەرکردایەتی یەکگرتووی ئیسلامی کوردستان، لە هەژماری تایبەتی خۆی لە تۆڕی کۆمەڵایەتی فەیسبووک ڕایگەیاند، “دۆزی ڕەوای گەلی فەڵەستین، وەک کورد، دۆزی خاک و خەڵکە، خاکێکی داگیرکراو و گەلێکی ستەملێکراو”.
هەڵەدنی کە پەیامەکەی بەناونیشانی “دووفاقی ئەردۆگان” بڵاوکردووەتەوە، دەڵێ “ئەوە چوار ڕۆژە جەنگی غەززە و ئیسرائیل دەستی پێکردووە، کەچی تورکیا و ئەردۆگان قڕوقەپیان لێکردووە”.
زیاتر دەڵێ “ئەوەی زۆر نان و پیازی بە دۆزی ئیسلامییەکان بەگشتی و فەڵەستینەوە دەخوارد بەتایبەتی لەڕابردوودا، ئەردۆگان بوو؛ ئێمە دەمانگوت ئەم نەژادپەرستە، بەرژەوەندیخوازە، گاڵتە بە سۆزی موسوڵمانان دەکات.”
ڕوونی دەکاتەوە، ئەردۆگان، “سەرقاڵبوونی دنیای بە ئیسرائیل و غەززە قۆستەوە بۆ هێرشی دڕندانەی بۆ سەر ڕۆژئاوا و ژێرخانی ڕۆژئاوای خاپوورکرد، چونکە ڕۆژئاوا هیچ پاڵپشت و پشتیوانییەکیان نییە تەنانەت لە ڕووی ڕاگەیاندنیشەوە”.
وەک ئەبوبەکر هەڵەدنی ئاماژەی بۆ کردووە، “تەنیا لە ماوەی سێ ڕۆژی بۆردمانی دەوڵەتی خوێنڕێژی تورک بۆ ڕۆژئاوا”، چەندین دامەزراوە خاپوورکراون، لەناویاندا:
١ قوتابخانە
١٩ دامەزراوەی نەوتی
٤ وێستگەی ئاو
٦ وێستگەی کارەبا
٢ نەخۆشخانە
٥ کارگە
١ ڕادیۆ
١ ئەمباری گەنم
