زێدپرێس
بەگوێرەی ئامارێکی لێژنە هاوبەشەکانی قایمقامیەتی سلێمانی، لەماوەی مانگەکانی ئەیلوول و تشرینی یەکەمی ئەمساڵدا، لەلایەن لێژنە هاوبەشەکانەوە، سەردانی ٧ هەزار و ٧٤٣ شوێنکار کراوە؛ ٨٣٩ شوێنکار ئاگادارکراونەتەوە و هەزار و ٤٩٧ سەرپێچی تۆمارکراوە.
لە تشرینی یەکەمدا، پسولەی ئاگادارکردنەوە بە ٤٠٥ شوێنکار دراوە و ٢٠ شوێنکاریش داخراون و ٧ شوێنیش ڕووبەڕووی دادگا و ڕێکاری یاسایی کراونەتەوە. لەو مانگەدا بە بڕی ٤٧ ملیۆن و ٥٧٥ هەزار دینار سزای دارایی و پێبژاردن بەسەر شوێنکارەکاندا سەپێندراوە. ژمارەی سەرپێچییە تۆمارکراوەکان لەو مانگەدا، ٧٥١ حاڵەت بووە.
هەر بەپێی ئامارەکە، لە مانگی ئەیلوولدا، ٢٨ شوێنکار لەلایەن لێژنە هاوبەشەکانەوە داخراون و ٧ شوێنیش ڕووبەڕووی دادگا کراونەتەوە. لەو مانگەشدا، بەبڕی ٣٥ ملیۆن دینار سزای دارایی و پێبژاردن بەسەر شوێنکارەکاندا سەپێندراوە، بەهۆی سەرپێچی و پابەندنەبوون بە ڕێنماییەکانەوە. کۆی سزای پێبژاردن لە هەردوو مانگەکەدا بڕی ٨٢ ملیۆن و ٥٧٥ هەزار دینار بووە.
لە مانگی ئەیلوولدا، ٧٤٦ سەرپێچی تۆمارکراوە و پسولەی ئاگادارکردنەوە بۆ ٤٣٢ شوێنکار کراوە.
هەر بەپێی ئامارەکە ٩٣ تۆن و ٨٧٣ کیلۆگرام شمەک و خۆراک بەهۆی بەسەرچوون و خراپبوونەوە لەلایەن لێژنەی تایبەتەوە تەلەف کراون.
