زێدپرێس
ئێوارەی ئەمڕۆ دووشەم، ٢٠ی تشرینی دووەمی ٢٠٢٣، باسم عەواد گوتەبێژی حکوومەتی عێراق ڕایگەیاند، داواکاری دەستلەکارکێشانەوەی هەرسێ وەزیری ڕۆشنبیری، پلاندانان و پیشەسازی، لەلایەن محەمەد شیاع سوودانی سەرۆکوەزیرانی عێراق ڕەتکراوەتەوە و پەسندنەکراوە.
ڕۆژی سێشەم، ١٤ی تشرینی دووەمی ٢٠٢٣، هەریەک لە محەمەد تەمیم وەزیری پلاندانان، خالید بەتال وەزیری پیشەسازی و ئەحمەد بەدرانی وەزیری ڕۆشنبیری حکوومەتی عێراق دەستلەکارکێشانەوەیان لە کابینەکەی سوودانی پێشکەشکرد.
هەرسێ وەزیرەکە لە پشکی پارتی تەقەدوومن، کە لەلایەن محەمەد حەلبووسی سەرۆکی دوورخراوەی ئەنجوومەنی نوێنەرانی عێراقەوە، سەرۆکایەتی دەکرێت.
دەستلەکارکێشانەوەی سێ وەزیرەکەی پارتی تەقەدووم، لە هەمان ڕۆژی ڕاگەیاندنی بڕیاری دادگای باڵای فیدڕاڵیی عێراق هات، بە هەڵوەشاندنەوەی ئەندامێتیی محەمەد حەلبووسی لە ئەنجوومەنی نوێنەرانی عێراق.
