زێدپرێس
جەبار مستەفا سەرۆکی دەزگای گشتی کاروباری مین لە کۆنگرەیەکی ڕۆژنامەوانیدا ڕایگەیاند: لەماوەی ساڵی ڕابردوو، بەهەوڵە بەردەوامەکانی تیمەکانی مینلابه‌ری دەزگای مین و ڕێكخراوه نێوده‌وڵه‌تییه‌كان توانراوە دوو ملیۆن و ٨٠٣ هەزار و ٣٢٦ مەتر دووجا، لە مین و تەقەمەنی پاکبکرێتەوە، کە لە چاو ساڵی پێش خۆی ڕووبه‌ری پاككراو زیاد كراوه، کە خۆی لە (٣٣) کێڵگە مین و (١١) شەڕگە دەبینێتەوە، دوای پاککردنەوەشیان ڕادەستی خاوەنەکانیان کراونەتەوە و ئێستا دەتواندرێت بۆ کاری کشتوکاڵ و ئاژەڵداری و پڕۆژەی ئابووری و وەبەرهێنان به‌کاربهێندرێـت و هیچ مەترسییەکیان لەسەر نەماوە.
ناوبراو باسی لە ژمارەی ئەو مین و تەقەمەنییانە کرد، کە لەڕێگەی تیمەکانی مینلابەری دەزگای گشتی کاروباری مین و ڕێکخراوەکانەوە هەڵگیراونەتەوە و لە ناوبردراون، کە ژمارەیان بریتی بووە لە سێ هەزار و ٨٤٩ مینی دژەکەسی و مینی دژە تانک، هەروەها زیاتر لە شەش هەزار و ٢٨٤ پارچە تەقەمەنی سەرپێی (IED) و پاشماوەی جەنگی نەتەقیوو لە خۆگرتووە، کە هەر مین و تەقەمەنییەک مەترسی بووە بۆ سەر گیانی هه‌زاران هاووڵاتی و گیانلەبەران و ژینگەی کوردستان.
سەرۆکی دەزگای گشتی كاروباری مین دڵگرانی خۆی بە ژمارەی شەهید و برینداران دەربڕی کە لە ساڵی ٢٠٢٣ بەهۆی مین و تەقەمەنییەوە بوونەتە قوربانی و ڕایگەیاند: “لەو ساڵەدا (٢٣) بەرکەوتوو بە ڕو٢داوەکانی مین و تەقەمەنی تۆمارکراوە، لەو ژمارەیەش بەداخەوە (١٠) کەس گیانیان لەدەستداوە و (١٣)ی تریش بریندار و کەمئەندام بوون، کە بەشێکی قوربانییان بۆ پابەند نەبوون بە ڕێنماییەکانی دەزگای مین دەگەڕێتەوە، کە سەرجەم کێڵگە مینەکان هێما و نیشانەی ئاگادارکردنەوەیان بۆ کراوە”.
لەكۆتایی کۆنگرە ڕۆژنامەنووسییەکەدا سەرۆکی دەزگای گشتی کاروباری مین ژمارەی سوودمەندبووانی لە بەرنامەی هۆشیارکردنەوە لە مەترسییەکانی مین و تەقەمەنی ڕاگەیاند کە خۆی لە ٨٥ هەزار کەس لە پیاو ئافرەت و منداڵ دەبینێتەوە بەتایبەت بۆ ئەو ناوچانەی نزیکن لە کێڵگە مینەکان و ناوچە مەترسیدارەکان بە مین و تەقەمەنی.
