زێدپرێس
بەگوێرەی زانیارییەکانی سەرچاوەیەکی تایبەت لە دووەمین کۆنفرانسی بزووتنەوەی گۆڕان کە قسەی بۆ زێدپرێس کرد، ئەمڕۆ یەکشەم لە دووەمین کۆنفرانسی حزبەکەدا، ڕاپۆرتی “هەڵسەنگاندنی كار و چالاكی نوێنەرەكانی گۆڕان لەناو پەرلەمان و حكوومەت” خراوەتەڕوو و لەلایەن ئەندامانی کۆنفرانسەوە پەسندکراوە.
لەو چوارچێوەیەدا و پێوەست بە ئامادەیی گۆڕان لە حکوومەتی هەرێمدا، سێ بژاردە خراوەتە بەردەم ئەندامانی کۆنفرانسەوە، بژاردەکانی مانەوە لە حکوومەت، کشانەوە لە حکوومەت و دیراسەکردنی پڕەنسیپی کشانەوە.
سەرچاوەکە ئاماژەی بەوە کرد، زۆرینەی دەنگەکان لە بەرژەوەندی بژاردەی سێیەم بوون کە دیراسەکردنی پڕەنسیپی کشانەوەیە لە حکوومەت.
سەبارەت بەو پرسیارەی کە ئەگەری کشانەوەی حزبەکە لە حکوومەت چەندە، ئەو سەرچاوەیە گوتی: “ئەگەرێکی کەم هەیە”.
دوێنێ شەممە، ٢٠ی کانوونی دووەمی ٢٠٢٤ دووەمین كۆنفرانسی بزووتنەوەی گۆڕان لە مەكۆی سەرەكی و بەئامادەبوونی ٩٠٠ ئەندام دەستی پێکرد.
