ئەمڕۆ هەینی ٢٦ی کانوونی دووەمی ٢٠٢٤ کۆمپانیای داناگازی سەرکار لە کێڵگەی گازی کۆمۆر لە ڕاگەیەندراوێکدا ئاماژەی بەوە کرد، کە بەرهەمهێنانی گازی لە کێڵگەکە بە تەواوەتی ڕاگرتووە، دوای ئەو هێرشەی کە شەوی ڕابردوو کرایە سەر کێڵگەکە و لە ئەنجامدا ئاگرێک لە یەکێک لە کۆگاکانی هەڵگرتنی گازی شل لەناو کێڵگەکەدا کەوتەوە.
بەپێی ڕاگەیەندراوەکەی داناگاز، ئێستا تیمەکانی بەگەڕخستن سەرقاڵی لەبەرگرتنی ڕێکاری پێویستن بۆ کۆنتڕۆڵکردنی دۆخەکە و پێشبینی دەکرێت لە نزیکترین کاتدا دەست بە وەبەرهێنان بکرێتەوە.
شەوی ڕابردوو، وەزارەتی کارەبای حکوومەتی هەرێمی کوردستان لە ڕاگەیەندراوێکدا ئاماژەی دا، کە بەهۆی ئەو هێرشەی کراوەتە سەر کێڵگەی کۆرمۆر و ئاگرکەوتنەوە تیایدا، لەپێناو سەلامەتیی کارمەندان و کێڵگەکە، هەناردەکردنی گازی کۆرمۆر بۆ سەرجەم وێستگەکانی بەرهەمهێنانی كارەبا ڕاگیرا و بووە هۆی كەمبوونەوەی زیاتر لە 2800 مێگاوات بەرهەمهێنانی كارەبا و لەگەڵ ئاساییبوونەوەی دۆخەکە، ڕەوشی کارەبا ئاسایی دەبێتەوە.
کاتژمێر ١٠:٢٢ خوولەکی شەوی ڕابردوو ٢٥/٢٦ی کانوونی دووەمی ٢٠٢٤ هێرشکرایە سەر کێڵگەی گازی کۆرمۆر و گومان دەکرێت هێرشەکە لە ڕێگەی درۆنی بۆمبڕێژکراوەوە ئەنجامدرا بێت.
