شاکر واجد بەڕێوەبەری گشتی کۆمپانیای داناگاز-ی سەرکار لە کێڵگەی کۆرمۆر بە میدیاکانی ڕاگەیاند، ئێستا بەرهەمهێنانی گاز لە کێڵگەی کۆرمۆر دەستی پێکردووەتەوە، دوای ئەو هێرشەی شەوی ڕابردوو کرایە سەر کێڵگەکە و لە ئەنجامدا ئاگر لە کۆگایەکی گازی شل کەوتەوە.
کاتژمێر ١٠:٢٢ خوولەکی شەوی ٢٥/٢٦ی کانوونی دووەمی ٢٠٢٤، هێرشکرایە سەر کێڵگەی گازی کۆرمۆر لە سنوری چەمچەماڵ و بەهۆیەوە بەرهەمهێنان بە تەواوەتی لە کێڵگەکە ڕاگیرا.
دوا بەدوای هێرشەکە وەزارەتی کارەبای حکوومەتی هەرێمی کوردستان ڕایگەیاند، بەهۆی ڕاگرتنی هەناردەکردنی گاز لە کۆرمۆرەوە بۆ وێستگەکانی بەرهەمهێنانی کارەبا بڕی ٢٨٠٠ مێگاوات لە بەرهەمی کارەبا کەمی کردووە و لەوکاتەیشەوە دۆخی کارەبای نیشتمانی لە هەرێمی کوردستان تێکچوو.
سەرچاوە فەرمییەکانی حکوومەتی هەرێمی کوردستان ئاماژەیان بەوە کردووە، هێرشەکە لە ڕێگەی درۆنەوە ئەنجامدراوە.
محەمەد شیاع سوودانی سەرۆکوەزیرانی عێراق بڕیاری پێکهێنانی لێژنەیەکی لێکۆڵینەوەی لە هێرشەکە داوە و داوای کردووە لەماوەی ٤٨ کاتژمێردا لێکۆڵینەوەکە بە ئەنجام بگات.
