ئەمڕۆ یەکشەم، ٤ی شوباتی ٢٠٢٤، بە بۆنەی ڕۆژی جیهانیی بەرەنگاربوونەوەی شێرپەنجە، لە کۆنگرەیەکی ڕۆژنامەنووانیدا لەشاری سلێمانی، د. سەباح هەورامی بەڕێوەبەری گشتی تەندروستی سلێمانی ڕایگەیاند، لە بەڕێوەبەرایەتی گشتی تەندروستی سلێمانی توانیویانە پشکنینی پێشوەخت بۆ شێرپەنجە بکەن، کە یەکێکە لە کلیلە چارەسەرییەکانی نەخۆشییەکە و ئاماژەیدا، “گەر هەر هاووڵاتییەك ئەو پشکنینانە ئەنجامبدات ئەوا لە نێوان مردن و ژیاندا، ژیان و سەرکەوتن هەڵدەبژێرێت بە دڵنیاییەوە هیچ کاریگەرییەکی لەسەر قۆناغەکانی دیکەی داهاتووی تووشبووەکە نابێت”.
هەر لە کۆنگرە ڕۆژنامەوانییەکەدا، ئاماری تووشبوانی سەرجەم جۆرەکانی شێرپەنجە خرایە ڕوو کە ٤٦ هەزار و ٧٥١ نەخۆش بووە، لەو ژمارەیە (١٨.١٪)ی شێرپەنجەی مەمك، ڕێژەی (٦.٣٪) شێرپەنجەی قۆلۆن و (٦.١٪) شێرپەنجەی سییەکان و (٥.٢٪) شێرپەنجەی پرۆستات بووە، “ئەم جۆرانەش لە باوترین جۆری شێرپەنجەن لە ناوچەکەدا و دەتوانین پشکنینی پێشوەختەی بۆ بکەین”، د. سەباح هەورامی وای گوت.
بەڕێوەبەری گشتی ئاماژەی بەوەشدا، “بەداخەوە ئێستا نەخۆشی شێرپەنجە ڕوو لە زیادبوونە، بەتایبەت شێرپەنجەی خوێن و شێرپەنجەی مێشك لە منداڵاندا”.
بەپێی ئامارەکانی نەخۆشخانەی هیوا، تا ئێستا ٢٥ هەزار و ٦٩٧ تووشبوو چارەسەریان بۆ کراوە، کە ٦١٪ لەناو پارێزگای سلێمانی و ٣٩٪ پارێزگاکانی دیکەن، هاوکات ئاماژە بەوەشدراوە، ئەو نەخۆشانەی لەو ناوەندەدا چارەسەر وەردەگرن، بە ئامێری تیشکی تایبەت بە چارەسەرکردنی شێرپەنجە و پێداویستی تایبەت چارەسەریان بۆ دەکرێت.
