ئەمڕۆ شەممە، ١٠ی شوباتی ٢٠٢٤، نووسینگەی ڕاگەیاندنی سەرۆکی حکوومەتی هەرێمی کوردستان لە ڕوونکردنەوەیەکدا ڕایگەیاند، “هەندێک ماڵپەر و پەیجی ناوخۆی سۆشیال میدیا، بە بڵاوکردنەوەی هەندێک لێدوان و لێکدانەوەی نەگونجاو و دوور لە ڕاستییەکانی کایەی سیاسی و ئەمنیی دەڤەرەکە، هەوڵیان داوە بۆچوون و لێدوانەکانی بەڕێز سەرۆکی حکوومەتی هەرێمی کوردستان لە میانەی دوا چاوپێکەوتنیدا لەگەڵ کەناڵی (NBC) بەلاڕێدا ببەن”.
هەر لە ڕوونکردنەوەکەدا هاتووە: “سەرۆکی حکوومەت پێداگریی لە پاراستنی قەوارەی دەستووریی هەرێمی کوردستان کردووە و بەردەوامیش دەبین لە گرتنەبەری هەموو ڕێکارێک بۆ دوورخستنەوەی مەترسییەکان لە سەر هەرێمی کوردستان”.
زیاتر دەڵێ: “خۆدزینەوە و خۆگێلکردن بەرانبەر بە ناحەزان، هیچ لە مەترسی و هەڕەشەکان کەم ناکاتەوە، بۆیە پێویستە هەموو لایەک لە ئاستی بەرپرسیاریەتیدا بن بەرانبەر بە خاک و خەڵکی هەرێمی کوردستان”.
