دەستەی سەربەخۆی مافی مرۆڤ لەڕاگەیەندراوێکدا ئاشکرای کرد، ئەو کەسەی دوێنێ شەممە، ١٠ی شوبات لە ڕێگەی گرتەیەکی ڤیدیۆییەوە سووکایەتی بە گۆڕستانی مەسیحییەکان کرد، لەلایەن ئاسایشی هەولێرەوە دەستگیر کراوە و بەهۆی ئەوەی تەمەنی لە خوار ١٨ ساڵەوەیە، ئێستا لە چاکسازی ژنان و منداڵان ڕاگیراوە.
بەگوێرەی ڕاگەیەندراوەکەی دەستەی مافی مرۆڤ، تۆمەتبارەکە دانیشتووی ناحیەی دارەتووی سەر بە شاری هەولێرە و لە گوتەکانیدا بۆ تیمی دەستەی مافی مرۆڤ ئاماژەی بەوە کردووە، لەپێناو پەیداکردنی ناوبانگ لە تۆڕە کۆمەڵایەتییەکاندا ئەو کارەی کردووە و ئێستا پەشیمانە.
دەقی ڕاگەیەندراوەکە:
دوای ئەوەی ڕۆژی شەممە ١٠ی شوبات لە گرتەیەکی ڤیدیۆیی کەسێک سوکایەتی بە گۆڕستانێکی مەسیحیەکان دەکات لە شارۆچکەی شەقڵاوە و قسەی نەشیاو دەکات و هەر لە گرتەکەش منداڵێکیش بەکاردەهێنێت و فێری دەکات کە سوکایەتی بەگۆڕەکان بکات، بۆ ئەو مەبەستە دەستەی سەربەخۆی مافی مرۆڤ پەیامێکی بڵاوکردەوە و دوای ئیدانەکردن و دەربڕینی نیگەرانی بەرانبەر ئەو ڕەفتارە داوای لە دەزگا یاساییەکان و ئەمنییەکان کرد ئیجرائاتی پێویست بکەن و ئەو کەسە بدۆزرێتەوە و ڕادەستی دادگا بکرێت و ڕێگری بکرێت لەو کەسانە کە دەبنە مایەی پشێوی و ئاژاوە نانەوە.
لەو بارەوە ڕۆژی یەکشەم ١١ی شوبات تیمێکی دەستە لەسەر ڕاسپاردەی بەڕێز سەرۆکی دەستە بەدواداچونیان کرد و سەردانی ئاسایشی هەولێریان کرد بۆ ئەم مەبەستە.
ئاسایشی هەولێر ئاماژەیان بەوە کرد کە ناوبراو لەلایەن هێزەکانیان دەستگیرکراوە بەناوی (ڕ. س. ع) و بەهۆی ئەوەی تەمەنی لە خوار ١٨ ساڵە و نەوجەوانە، ئێستا لە چاکسازی ژنان و منداڵان ڕاگیراوە.
دواتر تیمەکەی دەستە سەردانی چاکسازی هەولێریان کرد و دوای ڕێکارەکان لە نزیکەوە کەسی ناوبراویان بینی، گفتوگۆیان لەگەڵ کرد و ناوبراو جەختی کردەوە و دانی پێدانا کە ئەو بووە ئەو کارەی کردووە، هۆکارەکەشی بۆ ئەوە گەڕاندۆتەوە گوایە ویستویەتی ناوبانگ پەیدا بکات و زیاتر لە تۆڕە کۆمەڵایەتییەکان بناسرێت و ئێستا پەشیمانە. ناوبراو دانیشتوی شارۆچکەی دارەتووی سەربە شاری هەولێرە و پیشەی کاسبکارە. .
لێرەوە بە پێویستی دەزانین وەک دەستەی مافی مرۆڤ سوپاسی هێزەکانی ئاسایش بکەین کە لەماوەیەکی کورتدا ئەو کەسەیان دۆزیەوە و ڕادەستی یاسایان کرد، هەروەها جێی خۆیەتی دەست خۆشی لە داواکاری گشتیش بکەین کە داوای جۆڵاندنی ئەو کەیسەی کردووە.
ئەوەش لە پێناو ڕێگریکردن لە سوکایەتیکردن بە ئایینەکان و کەسەکان بەگشتی و بیروباوەڕەکان بەتایبەتی. جگە لەوەش ئەو ڕەفتارانە جۆرێکە لە دەرەنجامی وتاری توندڕەوی و تۆوی ڕق و کینە کە خەڵکێک بەردەوام دەیچێنێت لەناو کۆمەڵگە و وا دەکات ئەو جۆرە کەسانە سوکایەتی بە ئایینەکان و پیرۆزی بیروباوەڕەکان بکەن.
بەهیواین ئەو جۆرە ڕەفتارانە دووبارە نەبنەوە و هەمومان بەشێک بین لە بڵاوکردنەوەی وتار و پەیامی ئاشتی و یەکتر قبوڵکردن.
وەک دەستەی سەربەخۆی مافی مرۆڤ بەردەوام دەبین لە چاودێریکردنی ئەو کەیسە و هەر بابەتێکی تر لە پێناوی ئەوەی سەروەری یاسا ڕێزی لێ بگیرێت و جێبەجێ بکرێت.
دەستەی سەربەخۆی مافی مرۆڤ لەهەرێمی کوردستان
١١ی شوباتی ٢٠٢٤
