ئەمڕۆ هەینی ١٦ی شوباتی ٢٠٢٤، بەڕێوەبەرایەتی گشتی کەشناسی و بومەلەرزەزانی هەرێمی کوردستان پێشبینییەکانی بۆ کەشوهەوای ٤٨ کاتژمێری داهاتوو ڕاگەیاند.
بەگوێرەی بەڕێوەبەرایەتی کەشناسی، ئەمڕۆ هەینی، ئاسمان هەوری تەواو دەبێت و لە دوانیوەڕۆیشەوە شەپۆلێکی دیکەی باران بارین ڕوو لە هەرێمی کوردستان دەکات. سەرەتا باران بارین لە باکووری ڕۆژئاوای هەرێم دەست پێدەکات و پاشان تەواوی ناوچەکانی دیکە دەگرێتەوە.
کەشناسی دەڵێ، بارانەکە بەشێوەی مامناوەند دەبارێت، هەندێک کات لێزمە باران و هەورە تریشقەشی لەگەڵ دەبێت. لە ڕاگەیەندراوەکەدا هاتووە، کە ئەو ناوچانەی ئەمڕۆ پێشبینی دەکرێت لە بەشێکی ڕۆژهەڵاتی پارێزگای هەولێر وەک (کۆیە و تەق تەق و هیران) و بەشێک لە سنووری ئیدارەی گەرمیان و پارێزگای کەرکووک، ئاستی دابارین زیاتر بێت بەراورد بە ناوچەکانی دیکە.
هەر بەگوێرەی پێشبینییەکانی بەڕێوەبەرایەتی گشتی کەشناسی و بومەلەرزەزانی، سبەی شەممە، ١٧ی شوباتی ٢٠٢٤، ئاسمان بە گشتی هەوری تەواو دەبێت و نمە باران و بارانی مامناوەند لە زۆربەی ناوچەکان دەبارێت؛ هەروەها لە هەندێک کات هەورە تریشقەی لەگەڵ دەبێت، پێشبینی دەکرێت لە کاتەکانی شەودا لە ناوچە شاخاوییە سنووری و بەرزاییەکاندا بەفربارینێکی کەم هەبێت.
