ئەمڕۆ چوارشەم، ٢١ی شوباتی ٢٠٢٤، دادگای باڵای فیدڕاڵیی عێراق بڕیاری لەسەر سکاڵای تایبەت بە مووچەی مووچەخۆرانی هەرێمی کوردستان دەکرد و بەگوێرەی بڕیارەکەیش حکوومەتی عێراق پابەندکراوە بە دابینکردنی مووچەی فەرمانبەران و مووچەخۆرانی هەرێمی کوردستان.
بەگوێرەی بڕیاری دادگەی باڵای فیدڕاڵی، دەبێت حکوومەتی عێراق لە ڕێگەی لقی بانکەکانییەوە لە هەرێمی کوردستان مووچەی مووچەخۆرانی هەرێمی کوردستان دابین بکات و هەروەها نابێت شایستە داراییەکانی مووچەخۆرانی هەرێمی کوردستان وەک قەرز لەسەر هەرێم حیساب بکرێن.
بڕیارەکەی دادگەی باڵای فیدڕاڵیی عێراق، هاوکات حکوومەتی هەرێمی کوردستانی پابەند کردووە، بە ڕادەستکردنی داهاتە نەوتی و نانەوتییەکانی هەرێمی کوردستان.
دابەشکردنی مووچەی مووچەخۆرانی هەرێمی کوردستان لەلایەن لقەکانی بانکەکانی عێراق لە هەرێمی کوردستان، هەرچەند لەلایەن دادگەی فیدڕاڵییەوە بڕیاری لەسەر دراوە، بەڵام وەک شارەزایانی دارایی و ژمێریاری ئاماژەی بۆ دەکەن، لەڕووی پراکتیکییەوە ئاڵۆزی و سەختی تێدایە، بەتایبەت لەوەی پێوەندی بە دیاریکردنی مووچە و سەرمووچە و دەرماڵە و وردەکارییەکانی دیکە لە مووچەی مانگانەی فەرمانبەرانەوە هەیە.
