د. زاهیر مەجید: هەرێمی کوردستان مافی بەڕێوەبردنی پڕۆسەکانی نەوت و گازی هەیە
زێدپرێس
د. زاهیر مەجید پسپۆڕ لە یاسا و گرێبەستەکانی نەوت، باس لە دەسەڵاتەکانی هەریەک لە حکوومەتی فیدڕاڵیی و حکوومەتی هەرێم لە بەڕێوەبردنی پڕۆسەکانی نەوت و گاز دەکات، بەگوێرەی ناوەڕۆکی دەستووری هەمیشەیی عێراق. ئەو، ڕوونی دەکاتەوە، حکوومەتی هەرێم مافی بەڕێوەبردنی پڕۆسەکانی نەوتی هەیە، بەڵام ئەو دەسەڵاتەیش ڕەها نییە.
د. زاهیر مەجید ئەو بانگەشانە ڕەت دەکاتەوە، کە باس لە ڕاڤەی جیاواز بۆ ماددە دەستوورییەکان دەکەن، وەک هۆکاری ناکۆکییەکانی هەولێر و بەغدا و ڕوونی دەکاتەوە، کە ناکۆکییەکان بنەڕەتی سیاسییان هەیە، بەڵام خراونەتە ژێر پەردەی یاسا و دەستوورەوە.
دەستووری عێراق چۆن مامەڵەی لەگەڵ پرسی نەوت و گازدا کردووە؟ ئایا هیچ ناکۆکییەک هەیە لە ماددەکانی دەستووری عێراق لەبارەی نەوت و گازەوە؟ ئەگەر هەیە لەکوێدایە و بەدیاریی کراویی لە چ ماددە و بڕگەیەکدا؟
د. زاهیر مەجید: پرسی نەوت و گاز گرنگییەکى تەواوى پێدراوە لە دەستورى عێراق، بەجۆرێک هەردوو مادەى (١١١) و (١١٢) تایبەتکراون بۆ ڕێکخستنى بوارى نەوت و گاز و چۆنیەتى بەڕێوەبردنی لایەنە جیاوازەکانى، وەک دیارکردنى خاوەنداریەتی هەموو نەوت و گازى عێراق بۆ هەموو گەلى عێراق، واتا هیچ لایەن و حزب و چینێکى دیاریکراو بۆى نییە قۆرخى نەوت و گاز بکات و بە تەنیا بۆ بەرژەوەندییەکانى خۆى بەکارى بهێنێت. هەروەها دەستور ئەوەى دیاریکردووە کە حکوومەتى فیدڕاڵی بە هەماهەنگى لەگەڵ حکوومەتى هەرێمەکان و پارێزگاکان هەڵدەستن بە ئیدارەکردنى بوارە جیاوازەکانى نەوت و گاز لە عێراقدا، سەبارەت بەو کێڵگە نەوتییانەى کە لەکاتى نووسینەوەى دەستور لەکارکردندا بوون (الحقول الحالیە). هەروەک دەستور ئاماژەى بۆ ئەوەش کردووە کە حکوومەتى فیدڕاڵی لەگەڵ حکوومەتى هەرێمەکان و پارێزگاکان هەڵدەستن بە داڕشتنى سیاسەت و ستراتیژیەتى تایبەت بە پێشخستنى بوارى نەوت و گاز لە عێراق، بەجۆرێک باشترین سوود و قازانج بە هەموو گەلانى عێراق بگەیەنێت.
بە بۆچوونى من هیچ ناکۆکیەک نییە لەنێوان بڕگە و ماددەکانى دەستور سەبارەت بە بەڕێوەبردنی نەوت و گاز، بەڵکوو هەر ماددە و بڕگەیەک بۆ مەبەستێکى دیاریکراو دانراوە. هەروەک لە سەرەوە ئاماژەم بە ناوەڕۆکى هەردوو ماددەى (١١١) و (١١٢) کرد.
ئەگەر ناکۆکیی نییە لەو ماددانەی دەستوور کە تایبەتن بە نەوت و گاز، بۆچى لایەنە جیاجیاکانی عێراق لەسەر دەرچوونی یاسایەک بۆ نەوت و گاز کۆک نین؟
د. زاهیر مەجید: دەستورى عێراقیش وەکو هەر دەستورێکى دیکە بەزمانێکى دیاریکراو نووسراوە، ئەویش زمانى عەرەبییە. هیچ وشەیەکى سیحرى بەکارنەهاتووە، کە ماناکەى شاراوە و بزر بێت، بەڵکوو هەموو وشە و ڕستەکان ڕوون و ئاشکران. بۆیە ماددەکانى دەستور ناکۆکیان لە نێواندا نییە، بەڵکوو ڕێکنەکەوتنى لایەنە جیاوازەکانى عێراق لەسەر دەرچوونى یاساى نەوت و گاز لە عێراق دەگەڕێتەوە بۆ هۆکارى سیاسى و ویست و ئارەزووەکانى لایەنە جیاوازەکان بۆ کۆنتڕۆڵکردنى شادەمارى سەرەکى بوارى ئابوورى لە عێراق، کە ئەویش نەوت و گازە.
دەسەڵاتەکانی حکوومەتی فیدڕاڵی لەسەر نەوتی هەرێمەکان (هەرێمی کوردستان) چییە و دەستوور چۆن مامەڵەی لەگەڵدا کردووە؟
د. زاهیر مەجید: بەبۆچوونى من، بەپێى ماددەکانى دەستور، هەرێمەکانى عێراق بەشێکى جیانەکراوەن لە عێراق و ئەو نەوت و گازەى لە هەرێمەکاندا هەیە هەموو خەڵکى عێراق تێیدا هاوبەشن. واتا هەموو نەوت و گازى عێراق موڵکى هەموو گەلانى عێراقە، ئەمە بەشێوەیەکى گشتى، بەڵام بەگەڕانەوە بۆ ماددە جیاوازەکانى دەستور بۆمان ڕوون دەبێتەوە، کە ئیختیساسى دەسەڵاتە فیدڕاڵی و هەرێمیییەکان بەشێوازێکى ڕوون و ئاشکرا ڕێکخراون. بۆ نموونە ماددەی (١١٠) دەسەڵاتە حەسرییەکانى حکوومەتى فیدڕاڵی دیاری دەکات و لە نۆ بڕگەى سەربەخۆ پێکهاتووە. بەواتاى هەر یەکێک لەو دەسەڵاتانەى لەم ماددەیەدا هاتوون، تەنیا حکوومەتى فیدڕاڵی دەتوانێت ئەنجامیانبدات، بەڵام باسى لەئەنجامدانى گرێبەستە نەوتییەکان نەکردووە، وەک دەسەڵاتێکى حەسرى بۆ حکوومەتى فیدڕاڵی. بەهەمان شێوە لە ماددەی (١١٤) دەسەڵاتە هاوبەشەکانى نێوان حکوومەتى فیدڕاڵی و حکوومەتى هەرێمەکانى دیارکردووە لە حەوت بڕگەى سەربەخۆدا، بەواتاى ئەوەى هەردوو حکوومەت بە هەماهەنگى و تەنسیق لە نێوان خۆیاندا مومارەسەى ئەو دەسەڵاتانە دەکەن، کەچى لەو ماددەیەش باسى ئەنجامدانى گرێبەستە نەوتییەکان نەکراوە.
بەڵام لەلایەکى دیکەوە، بەگەڕانەوە بۆ ماددە (١١٥)ى دەستور، دەبینین زۆر بەڕوون و ئاشکرایى دەڵێت، هەر بابەتێک لە دەسەڵاتە حەسرییەکان و هاوبەشەکان ئاماژەیان بۆ نەکرابێت، ئەوا بەپێى یاساى هەرێمەکان ڕێکدەخرێت و ملکەچ دەبێت بۆ دەسەڵاتى هەرێمەکان.
بەڵام سەرەڕاى هەموو ئەوانەى سەرەوە، لەبەرئەوەى لە مادەى (١١١) و (١١٢)، کە تایبەتن بە پرسى نەوت و گاز، هاتووە، کە نەوت و گاز موڵکى هەموو گەلى عێراقە، ئەمە لەلایەک، لەلایەکى دیکەیش باس لەوە دەکات کە بەڕێوەبردنی نەوت و گاز بە هەماهەنگى و تەنسیق دەبێت لەنێوان حکوومەتى فیدڕاڵی و حکوومەتى هەرێمەکان. بۆیە ئێمە وا دەبینین، کە بەپێى ئەو ماددە دەستورییانە، حکوومەتى هەرێمەکان دەتوانن مومارەسەى دەسەڵاتى یاسایى خۆیان بکەن لەسەر ئەو نەوت و گازەى کە لە هەرێمەکەیاندا هەیە، بەڵام دەبێت بەرلەوە، ڕێککەوتن بکرێت لەگەڵ حکوومەتى فیدڕاڵی بۆ دیاریکردنى ستراتیژیەتێک سەبارەت بە چۆنیەتى هەڵسوکەوتکردن لەگەڵ پرسى نەوت و گاز بە هەموو لایەنە جیاوازەکانییەوە.
کەواتە ئەگەر وردتری بکەینەوە، دەسەڵاتی حکوومەتی هەرێمی کوردستان لەسەر نەوت لە هەرێمى کوردستان چییە و دەستووری عێراق چۆن مامەڵەی لەگەڵ کردووە؟
د. زاهیر مەجید: هەروەک لە وەڵامى پرسیارى پێشوو ئاماژەم پێکرد، بە بۆچوونى ئێمە، حکوومەتى هەرێمى کوردستان دەسەڵاتى یاسایى هەیە لەسەر ئەو نەوت و گازەى کە لە هەرێمدا دەدۆزرێتەوە، بەتایبەتى ئەو کێڵگە نەوتییانەى کە دواى دەرچوونى دەستورى عێراقى ساڵى ٢٠٠٥ دۆزراونەتەوە، چونکە بڕگەى یەکەم لە ماددەى (١١٢) باس لە پێکەوەیی (معا) لە کارکردن دەکات لە نێوان حکوومەتى فیدڕاڵی و حکوومەتى هەرێم لەو کێڵگانەى تا ئەوکات، واتە تا ساڵی ٢٠٠٥ دۆزرابوونەوە، بەرهەمهێن بوون و کاریان تێدا دەکرا. بەڵام ئەو دەسەڵاتانەى حکوومەتى هەرێم ڕەها نییە، بەڵکو پێویستە پێشوەختە ڕێککەوتن بکرێت لەگەڵ حکوومەتى فیدڕاڵی لەسەر داڕشتنى ستراتیژیەتێک بۆ چۆنیەتى مامەڵەکردن لەگەڵ پرسی نەوت و گاز.
چەند پڕۆژە یاسا هەیە بۆ نەوت و گاز لە عێراق، بەڕای ئێوە کامەیان باشترین پڕۆژەیە بۆ خەڵکی عێراق و کوردستان؟
د. زاهیر مەجید: بەپێى زانیارى ئێمە لە شوباتی ساڵى ٢٠٠٧ پڕۆژە یاسایەک هەبوو کە زۆربەى لایەنە سیاسییەکان ڕەزامەندیان لەسەرى دابوو بۆ ئەوەى وەک یاساى نەوت و گازى عێراقى دەربچێت، بەڵام دواتر ئەو پڕۆژەیە لە تەممووزی هەمان ساڵ گۆڕانکاری ڕیشەیی تێدا کرا لەلایەن ئەنجوومەنی شورای عێراقی، هەروەها بەهۆى تێکچوونى پەیوەندى نێوان هەندێک لایەنى بەغدا و حکوومەتى هەرێم، ئەمە بووە هۆى ئەوەى ئەم پڕۆژەیە پشتگوێ بخرێت. بۆیە دواتر دوو پڕۆژەى دی خرانەڕوو، یەکێکیان لەلایەن ئەنجوومەنى نوێنەرانى عێراق ئامادەکراوە، ئەوەى دیکەیش لەلایەن حکوومەتى عێراقەوە ئامادەکراوە. بەپێى خوێندنەوەى ئێمە بۆ ئەم پرۆژە یاسایانە، ئەو پڕۆژەی شوباتی ساڵى ٢٠٠٧ تا ڕاددەیەک بەباشتر دەزانین بۆ هەموو لایەک، بەڵام لەبەرئەوەى ئەم پڕۆژەیە هەر باس ناکرێت و پشتگوێ خراوە، بۆیە لەنێوان ئەم دوو پڕۆژەیەى دیکە پێشکەشکران لە ساڵی ٢٠١١ پڕۆژەى ئەنجوومەنى نوێنەران بە باشتر دەزانین، لەبەرئەوەى زۆربەى ماددەکانى لایەنى تەوافیقى تێدا بەدى دەکرێت، بۆ ئەو بوارانەى کە حکوومەتى هەرێم و حکوومەتى بەغدا جیاوازن لەبارەیانەوە.
حکوومەتی عێراق دەیەوێت ئەو پڕۆژەیە چۆن بێت و ڕۆڵی ئەو چی بێت؟
د. زاهیر مەجید: بەگەڕانەوە بۆ ئەو پرۆژەى لەلایەن حکوومەتى بەغداوە ئامادەکراوە، بەڕوونى دەردەکەوێت، کە ئەم حکوومەتە دەیەوێت کۆنتڕۆڵى هەموو جموجۆڵە پەیوەندیدارەکان بە نەوت و گاز بکات و دەسەڵاتەکانى هەرێمەکان زۆر سنووردار بکات، بەجۆرێک خۆى ڕۆڵى هەرە سەرەکى ببینێت لە چۆنیەتى هەڵسوکەوتکردن لەگەڵ پرسى نەوت و گاز لە هەموو عێراقدا، ئەوەش یەکانگیر نابێت لەگەڵ ماددە دەستورییەکان.
حکوومەتی هەرێم دەیەوێت چی لەو پڕۆژەیەدا هەبێت و ڕۆڵی ئەو چی بێت لەبواری نەوتدا؟
د. زاهیر مەجید: بێگومان حکوومەتى هەرێم دەیەوێت ئەو پڕۆژەیە بەجۆرێک بێت، کە دەسەڵاتى تەواوى پێبدات بۆ ئەوەى بەویستى خۆى هەڵسوکەوت بکات لەبوارى نەوت و گازدا، بەڵام بەپێى دەستور ئەمەش قبووڵ ناکرێت، چونکە حکوومەتى هەرێمیش بەشێکە لە عێراق و پێویستە ملکەچى دەستورى عێراق بێت. لەم دەستورەشدا هاتووە، کە نەوت و گاز موڵکى هەموو عێراقە، هەروەها پێویستە هەماهەنگی تەواو هەبێت لە نێوان حکوومەتى هەرێم و حکوومەتى بەغدا سەبارەت بە پرسى نەوت و گاز.
کەواتە، پێت وایە ململانێ لەسەر پڕۆژە یاساکە دەستووری و یاساییە یاخود هۆکارى سیاسى لە پشتەوەیە؟
د. زاهیر مەجید: بە بۆچوونى ئێمە بنەڕەتی ململانێکە هۆکارى سیاسى لەپشتەوەیە، بەڵام ئەم ململانێیە سیاسییانە پەردەپۆشکراون بە ڕاڤەکردنى دەقە دەستورییەکان. باشترین بەڵگەش بۆ ئەم قسەیە ئەوەیە، کە هەمان ئەو حزب و لایەنانەى دەستى باڵایان هەبووە لە نووسینەوەى دەستور، هەر ئەوانن ئێستا حوکمى عێراق و کوردستان دەکەن، ئەگەر هۆکارى سیاسى لەپشت نەبێت، چۆن ئەو ماددە دەستورییانە ئەوکات ڕێککەوتنیان لەسەرکرا و بۆچی ئەوکات ماناى دەقە دەستورییەکان زۆر ڕوون و ئاشکرابوون و هیچ تەمومژیان بەسەرەوەوە نەبوو، کەچى ئێستا بەجۆرێکى دی ڕاڤە دەکرێن، جیاواز لەوەى کاتى خۆى بۆیان کراوە؟
بۆیە ململانێکان سیاسیین، هەرچەندە لێرەولەوێ ئاماژە بۆ ئەوە دەکرێت، کە دەقە دەستورییەکانى تایبەت بە پرسى نەوت و گاز ماناکانیان ڕوون نییە یان هاودژى لەنێوانیان بەدى دەکرێت، چونکە لەڕاستیدا ئەو جۆرە قسانە زیاتر بیانگە و بیانوون بۆ بەیاساییکردنى ململانێ سیاسییەکان و هیچى دی.
تا ئێستا لە عێراق یاساى نەوت و گاز پەسەند نەکراوە، بەڵام ئایا گرێبەستەکان و بەرهەمهێنانى نەوت و گاز بەپێى چى یاسایەک دەکرێت؟
د. زاهیر مەجید: بەداخەوە تاکوو ئێستا هیچ یاسایەکى تایبەت بە نەوت و گاز لە عێراق نییە، بەڵام بەپێى بڕگەى یەکەم لە ماددەی (١١٢)ى دەستور، دەسەڵات دراوەتە حکوومەتى فیدڕاڵی و حکوومەتى هەرێمەکان بۆ چۆنیەتى ئیدارەکردنى بوارە جیاوازەکانى نەوت و گاز، بەڵام هەر لە کۆتایى هەمان بڕگەدا هاتووە، کە ئەو بابەتە بە یاسایەک ڕێکدەخرێت. کە واتا لەکاتێکدا کە ئەم بڕگەیە دەسەڵاتى داوەتە حکوومەتەکانى فیدڕاڵی و هەرێمەکان بۆ ئیدارەکردنى بوارى نەوت و گاز، لەهەمان بڕگەدا پێویستى کردووە، کە دەبێت یاسایەک دەربچێت و بوارە جیاوازەکانى نەوت و گاز ڕێک بخات.
هۆى جیاوازى لە جۆرى گرێبەستەکانى هەرێم و بەغدا چییە، ئەوانەى هەرێم لەجۆرى (گرێبەستی هاوبەش لە بەرهەمهێنان-PSC) و ئەوانەى عێراق بریتین لە (گرێبەستی خزمەتگوزاری –(Service contract، ئایا کامیان بەباشتر دەزانن بۆ بەغدا و هەرێم؟
د. زاهیر مەجید: هەروەک لەوەڵامى پرسیارى پێشوو ئاماژەمان پێکرد، کە تاکوو ئێستا یاسایەکى تایبەت بە نەوت و گاز لە عێراق دەرنەچووە، بۆیە جۆرى ئەو گرێبەستەى کە حکوومەتى عێراق ئەنجامى دەدات، دەوەستێتە سەر سیاسەتى حکوومەت و چۆنیەتى تێڕوانینى بۆ گرێبەستەکان. بەڵام لە هەرێمى کوردستان یاسای نەوت و گازى ژمارە ٢٢ى ساڵى ٢٠٠٧ دەرچووە، لەم یاسایەدا ئاماژە بۆ گرێبەستى (PSC- گرێبەستى هاوبەش لە بەرهەمهێنان) کراوە. بۆیە حکوومەتى هەرێم پەیوەستە بەو یاسایە و ئەو گرێبەستانەى ئەنجامیداوە لەجۆرى (PSC)ە. لەلایەکى تریشەوە حکوومەتى بەغدا گرێبەستى خزمەتگوزارى ئەنجامداوە، چونکە ڕێژەیەکى زۆر بیرى نەوتى دۆزراوە هەن و لەکارکردندان، هەروەها پێگەى سیاسى نێودەوڵەتى عێراق جێگیرە وەکوو دەوڵەتێکى سەربەخۆ، بەڵام حکوومەتى هەرێم زیاتر پشتى بەستووە بە گرێبەستى هاوبەشیی بەرهەم، چونکە لەناوچەکانى هەرێم بیرە نەوتى دۆزراوە، پێشتر کارى لەسەر نەکراوە، بۆیە حکوومەتى هەرێم پێویستى بە هاتنى کۆمپانیاى بیانى هەیە بۆ ئەوەى پێگەیەکى سیاسى بۆ خۆى دروست بکات. بێگومان ناکرێت لایەنى سیاسییش فەرامۆش بکەین لە ئەنجامدانى جۆرى گرێبەستە نەوتییەکان.
قسەى زۆر لە سەر یاسایى بوون و نەبوونى گرێبەستە نەوتییەکانى کوردستان کراوە، بەڵام ئایا لە بنەڕەتەوە هەرێمى کوردستان مافى مامەڵەکردن بە نەوت و گازى هەیە؟
د. زاهیر مەجید: بەگوێرەى دەستوورى هەمیشەیى عێراق، هەرێمى کوردستان و پارێزگا بەرهەمهێنەکانى نەوت، بە پێکەوەیی لەگەڵ حکوومەتى فیدڕاڵی، کێڵگەکانى نەوت بەڕێوەدەبەن، ئەوە لەلایەک، لەلایەکى دیکە، ماددەى (١١١)ى دەستوور، نەوت و گاز بە موڵکى گەل دادەنێت، لەپاڵ ئەوەشدا، کە دەستوور پرسى نەوت و گازى نەخستووەتە ناو دەسەڵاتە حەسرییەکانى حکوومەتى فیدڕاڵییەوە و جەختیش لەوە دەکاتەوە، ئەگەر هەر پرسێک لە چوارچێوەى دەسەڵاتە حەسرییەکانى حکوومەتى ئیتحادى و دەسەڵاتە هاوبەشەکاندا ئاماژەى بۆ نەکرابێت، ئەوە ڕاستەوخۆ لە دەسەڵاتى هەرێمەکان دەبێت. لەو روانگەیەوە، هەرێمى کوردستان مافى بەرهەمهێنانى نەوت و گازى هەیە. هەرچەند بەپێى دەستوور، دەبێت پڕۆسەکە بە پێکەوەیى ستراتیژ و سیاسەتی بەڕێوەبردن دیاری بکرێت. هەرێم ناتوانێت سەد لە سەد بەسەربەخۆیى پڕۆسەکە بەڕێوەببات، لە کێڵگەکانی ئێستا.
ئایا پەرلەمانى عێراق ڕۆڵى هەیە لە چاودێریکردنى گرێبەستەکانى نەوت و پڕۆسەى بەرهەمهێنانى نەوت و گاز لە عێراقدا؟ لەکاتێکدا دەستورى عێراقى بەڕاشکاوى دان دەنێت بە خاوەنداریەتی گەل بۆ نەوت و گاز و پەرلەمانیش نوێنەرایەتى گەل دەکات؟
د. زاهیر مەجید: بەپێى زانیارى ئێمە تا ئێستا ئەنجوومەنى نوێنەرانى عێراق هیچ ڕۆڵێکى نەبینیوە لە چاودێریکردنى ئەو گرێبەستە نەوتییانەى حکوومەتى عێراق ئەنجامى داون، بەڵکوو زۆربەى گرێبەستەکان ئاشکرانەکراون و شاراوەن. لەلایەکى ترەوە ئەو سوود و قازانجەى لە گرێبەستە نەوتییەکان دەست حکوومەتى عێراق دەکەوێت بەشێوەیەکى شەفاف ئاشکرا ناکرێت و پەرلەمانیش ڕۆڵى نەبینیوە لە دەرخستنى ئەو زانیارییانە سەبارەت بە گرێبەستەکان و قازانج و سوودەکانیان.
ئایا گرێبەستەکانى نەوت و گاز لە عێراق شەفافن، لە ڕووى یاساییەوە کێشەیان نییە؟
د. زاهیر مەجید: گومان لەوەدانییە کە ئەو گرێبەستانەى لە عێراق ئەنجامدراون شەفاف نین، چونکە ئیعلان نەکراون بۆ خەڵک، بەڵکو ئەنجوومەنى نوێنەرانى عێراق زانیارى تەواویان لەبەردەستدا نییە سەبارەت بەم گرێبەستانە. لەلایەنى یاساییەوە پێویستە هەر گرێبەستێکى نەوت و گاز ئەنجامبدرێت بەلایەنى کەم ئەنجوومەنى نوێنەرانى لێ ئاگادار بکرێتەوە، لەبەرئەوەى ئەوان نوێنەرى گەلى عێراقن. بەپێى ماددەی (١١١)ی دەستووری عێراق، هەموو نەوت و گازى عێراق موڵکى هەموو گەلى عێراقە، کە وابێت چۆن دەکرێت تەسەرووف بە موڵکى کەسێک بکرێت و ئەو کەسەش یان نوێنەرەکانی بەلانی کەم ئاگادار نەکرێتەوە لەم تەسەڕووفانە؟
- ئەم دیمانەیەی د. زاهیر مەجید، لە بنەڕەتدا تێکەڵکێشی دوو دیمانەی سەربەخۆیە، کە لە کۆتایی ٢٠١١ و سەرەتای ٢٠١٢ لەگەڵیدا سازکراون. دیدارێک کە ساڵی ٢٠١١ و لە چوارچێوەی پڕۆژەیەکی ڕێکخراوەکانی مەسەلە و ئێن پی ئەی نەرویجی، بەناونیشانی (بەرەو دەرچوونی یاسای نەوت و گازی عێراق) سازکراوە، بەشی هەرە سەرەکی دەقەکەی سەرەوە پێکدێنێت. پاش زیاتر لە ١٠ ساڵ، هێشتا بارودۆخەکە، لەوەی پێوەندی بە پرسی نەوت و گاز لە نێوان عێراق و هەرێمی کوردستان هەبێت، وەک خۆیەتی، وێڕای پێداگیریی و کارەکانی ئێستا، بۆ دەرکردنی یاسای نەوت و گازی عێراق، ناکۆکییەکانی نێوان هەردوو حکوومەت لە عێراق و هەرێمی کوردستان وەک خۆیان ماونەتەوە و چاوەڕوان دەکرێت لەگەڵ بەرەوپێشچوون لە کارەکانی هەردوو تیمی هەولێر و بەغدا بۆ ئامادەکردنی ڕەشنووسی پڕۆژەیاسای نەوت و گازی عێراق، ناکۆکییەکان ڕوونتر بەرجەستە ببنەوە.
