ئێوارەی ئەمڕۆ دووشەم، ١ی نیسانی ٢٠٢٤، مەحموود محەمەد گوتەبێژی پارتی دیموكراتی كوردستان ڕوونکردنەوەیەکی لەمەڕ هەڵوێستی حزبەکەی سەبارەت بە هەڵبژاردنی پەرلەمانی کوردستان بڵاوکردەوە و ئاشکرای کرد، کە دواخستنی هەڵبژاردن وەک بژاردەیەک خراوەتە بەردەم پارتییەوە، بەڵام پارتی لەسەر هەڵوێستی خۆی پێداگرە و “هیچ جۆرە دەستوەردانێكی نایاسایی لە هەڵبژاردنەکان قبوڵ ناکات”.
دەقی ڕوونکردنەوەکە:
ێوارەی ئەمڕۆ لە دەزگایەكی میدیایی هەواڵێك بڵاوكراوەتەوە كە گوایە پارتی داوای دواخستنی بەڕێوەچوونی هەڵبژاردنی بۆ كاتێكی تر كردووە بۆ ئەوەی بە هەمان مەرج و ڕێوشوێن و یاساکانی ئێستا، بەشداری لە هەڵبژاردن بکات.
لێرەدا ڕایدەگەیێنین كە ئەم هەواڵە هیچ بنەمایەكی نییە و پارتی لە سەر هەڵوێستی خۆی پێداگرە و هیچ جۆرە دەستوەردانێكی نایاسایی لە هەڵبژاردنەکان قبوڵ ناکات و بە پێویستی دەزانێ هەموو كەموكوڕییە تەكنیكی و پێشێلكارییە دەستووری و یاساییەكان لە شێوازی ئەنجامدانی هەڵبژاردن چارەسەر بكرێن و ڕاست بكرێنەوە، بۆ ئەوەی هەڵبژاردنێکی پاک و ئازاد و دەستووری بەڕێوە بچێت و سەرجەم هاووڵاتییانی کوردستان بە هەموو پێکهاتەکانەوە مافی دەنگدانیان هەبێت و ئەنجامەکانی هەڵبژاردنیش دەستکاری نەکرێن.
دواخستنی هەڵبژاردن وەک بژاردەیەک لەگەڵ پارتی باس کراوە بۆ ئەوەی پارتی بەشداریی هەڵبژاردن بکات و لێرەوە دووپاتی دەکەینەوە کە پارتی هەمیشە لەگەڵ هەڵبژاردنێکی دەستووری و شەفاف و بێگەردە و ئەگەر هەڵبژاردن بۆ كاتێكی تریش دوابخرێت دەبێت ئەو ڕاستكردنەوە دەستووری و یاسایی و تەکنیکییانە ئەنجام بدرێن كە بۆ بەڕێوەچوونی هەڵبژاردنێكی پاك و بێگەرد پێویستە.
مەحموود محەمەد
گوتەبێژی پارتی دیموكراتی كوردستان
١ـی نیسانی ٢٠٢٤
