چوار بەنداوی “ستراتیژی” لە هەرێمی کوردستان دروست دەکرێن
![](https://zedpress.krd/wp-content/uploads/2023/11/zed-press-pond-erbil-bandaw-780x470.jpg)
وەزارەتی کشتوکاڵ و سەرچاوەکانی ئاوی هەرێمی کوردستان ڕایگەیاند، تیمی هاوبەشی هەردوو وەزارەتی سەرچاوەکانی ئاوی هەرێمی کوردستان و عێراق دەستیانکردووە بە هەنگاوەکانی دروستکردنی چوار بەنداوی ستراتیژیی لە هەرێمی کوردستان.
ئەو چوار بەنداوە، پێکدێن لە (مەنداوە، باکرمان، تەقتەق و دەڵگە).
وەزارەتەکە لە ڕاگەیەندراوێکدا دەڵێ، لە دەرئەنجامی زنجیرە کۆبوونەوەکانی بێگەرد تاڵەبانی وەزیری کشتوکاڵ و سەرچاوەکانی ئاو و شاندی باڵای وەزارەتەکە لە بەغدا لەگەڵ سەرۆککۆماری عێراق، سەرۆکوەزیران، وەزیری سەرچاوەکانی ئاو و ناوەندەکانی بڕیار لە پەرلەمان و حکوومەتی فیدڕاڵی و هەروەها کۆبوونەوەی هاوبەشی شاندی تەکنیکی باڵای وەزارەتی کشتوکاڵ و سەرچاوەکانی ئاو لەگەڵ تیمی باڵای وەزارەتی سەرچاوەکانی ئاوی حکوومەتی عێراق، بەسەرپەرشتی خودی وەزیری سەرچاوەکانی ئاو، عۆن زیاب، لە ڕۆژی ٢٥ی نیسانی ٢٠٢٤ لە سەر پێکهێنانی لێژنە و دەستپێکردن بە کاری هاوبەش بۆ پڕۆژەی بەنداوەکان، لەچوارچێوەی دیراسەی ستراتیجی ئاو و زەویوزار، کۆنووسی هاوبەش و نەخشەڕێی هەنگاوی کرداری داندراوە.
بەگوێرەی ڕاگەیەندراوەکە، ڕۆژی پێنجشەم، ٩ی ئایار، لێژنەی تەکنیکی هاوبەشی هەردوولا لە بەغدا یەکەم کۆبوونەوەیان ئەنجامداوە، تایبەت بە ئامادەکردنی ڕاپۆرتی هاوبەش و نوێکردنەوەی توێژینەوە و نەخشەسازی چوار بەنداوەکە کە بڕیارە لەسەر بودجەی فیدراڵی لە هەرێمی کوردستان دروست بکرێن. “بەلێکتێگەیشتنی هاوبەش بەجۆرێک بەهای ئابوورییان بەرز بکرێتەوە لەڕووی زیادکردنی قەبارەی کۆکردنەوەی ئاو و بەرهەمهێنانی کارەبا و دابینکردنی پێویستییەکانی ئاو بۆ بەرژەوەندی هاوبەشی هەرێمی کوردستان و عێراق”، وەزارەتی کشتوکاڵ و سەرچاوەکانی ئاو، وایگوتووە.