دەستەی سەربەخۆی مافی مرۆڤ، ڕاگەیەندراوێکی لەبارەی کوژرانی گەنجێکی هەرێمی کوردستان لە تورکیا بڵاوکردەوە. گەنجەکە بەناوی (حەکیم لوقمان) و خەڵکی ناوچەی کەڵەکینی سەربە پارێزگای دهۆکە. کەسوکارەکەی ڕایانگەیاند، حەکیم لە کافتریایەکی شاری ئیستەنبوڵ بە زمانی کوردی قسەی کردووە و بەوهۆیەوە لەلایەن ژمارەیەک تورکەوە پەلاماردراوە و کوژراوە.
دەستەی مافی مرۆڤ دەڵێ: “ئەو هەواڵە هەموانی نیگەران کرد و پێشهاتێکی خراپە بۆ وڵاتێکی گەورەی وەک تورکیا کە بە وڵاتێکی گەشتیاری ناسراوە و ساڵانە هەزاران هاووڵاتی بۆ گەشت و بازرگانی سەردانی ئەو وڵاتە دەکەن و بۆ هەرێمی کوردستانیش تورکیا وڵاتێکی گرنگ و دراوسێیە”.
لە ڕاگەیەندراوەکەدا، دەستەی مافی مرۆڤ، سەرکۆنەی کوشتنی ئەو هاووڵاتییەی هەرێمی کوردستان دەکات و داوایش دەکات “لە ڕێگەی کونسوڵخانەی تورکیا لە هەرێمی کوردستان و حکوومەتی هەرێم و پەیوەندی دیپلۆماسی هەردوولا، حکوومەتی تورکیا لێکۆڵینەوە لە ڕووداوەکە بکات و تۆمەتباران بدۆزرێنەوە و بدرێنە دادگا و بەسزای یاسایی خۆیان بگەن و ڕێکاری پێویست بگیرێتە بەر بۆ پاراستنی گەشتیارو سەردانیکاران”.
کوشتن و سووکاتیپێکردن و پەلاماردانی هاووڵاتییانی کورد لە تورکیا، بەهۆی قسەکردن بە زمانی کوردی، تەنانەت ناوهێنانی کورد و کوردستان، حاڵەتێکی چەندبارە و بەربڵاوە لە تورکیا.
