زێدپرێس
شەوی ٢٨/٢٩ی تەمووزی ٢٠٢٣، پۆلیسی ئاکرێ ڕاگەیەنراوێکی بڵاوکردەوە و ئاماژەی دا، پاش ئەوەی پۆلیسی ئاکرێ ئاگەدارکرایەوە لە هەبوونی تاوانێکی کوشتن لەسەر شەقامی سەرەکی ئاکرێ-ڕوڤیا، دەستبەجێ مەفرەزەیەکی پۆلیسی چالاکییە مەدەنییەکان، پۆلیسی فریاکەوتن، بنکەی پۆلیسی گردەسێن، پۆلیسی بەڵگەی تاوان و نووسینگەی نەهێشتنی تاوانی سیپە، گەیشتنە شوێنی ڕووداوەکە.
بەپێی ڕاگەیەنراوی پۆلیسی ئاکرێ، دەرکەوتووە، گەنجێکی تەمەن ٣٢ ساڵ بەناوی (ه. م. س) کوژراوە و یەکێکی دیکەیش بەناوی (ش. م. م) تەمەن ٣٢ ساڵ بریندار بووە.
بەپێی ڕاگەیەنراوەکە، لە لێکۆڵینەوەی سەرەتاییدا دەرکەوتووە، ڕووداوەکە بەهۆی کێشەیەکی کۆنی کۆمەڵایەتییەوە بووە و لەلایەن چەند کەسێکەوە تەقە لە هەردوو گەنجەکان کراوە و لە ئەنجامدا یەکێکیان گیانی لەدەستداوە و ئەوی دی بریندار بووە.
بەڕێوەبەرایەتی پۆلیسی ئاکرێ، ڕوونی کردووەتەوە، دۆسیەی لێکۆڵینەوە لە ڕووداوەکە کراوەتەوە، بەگوێرەی مادەی ٤٠٦ لە یاسای سزادانی عێراقی و لەلایەن دادوەری لێکۆڵینەوەوە فەرمانی گرتن بۆ تاوانباران دەرکراوە.
