زێدپرێس
ئەمڕۆ چوارشەم ١٨ی تشرینی یەکەمی ٢٠٢٣، جۆ بایدن سەرۆکی ئەمریکا گەیشتە ئیسرائیل و لە فڕۆکەخانەی بن گۆریون دابەزی.
دواتر، جۆ بایدن لە کۆنگرەیەکی ڕۆژنامەوانیدا، لێدوانی بۆ ڕۆژنامەنووسان دا.
لەبارەی بۆردمان/تەقینەوەکەی نەخۆشخانەی مەعمەدانی لە غەززە، گوتی “پاڵپشت بەو شتانەی بینیومن، وا دەردەکەوێت کە لەلایەن لایەنەکەی دیکەوە ئەنجامدراوە”.
سەرۆکی ئەمریکا، کردەوەکانی حەماسی بە “دڕاندانە” و خراپتر یان هاوشێوەی داعش وەسف کرد.
گوتیشی: “دەبێت ئەوەش لەبەرچاو بگرین، کە حەماس نوێنەرایەتی هەموو گەلی فەڵەستین ناکات و تەنیا ئازاری بۆ هێناون”
سەرۆکی ئەمریکا هەروەها گوتی: “بە قوڵی دڵتەنگم و توڕەم بەهۆی تەقینەوەکەی دوێنێی نەخۆشخانەی غەززە”. بانگەشەی کرد، بە پشتبەستن بەو شتانەی کە بینیویەتی، وا دەردەکەوێت کە لەلایەنی بەرانبەرەوە کراوە نەک ئیسڕائیل.
ئاماژەی بەوەشکرد، ئەمریکا ئەوەی پێویستە بۆ بەرگریکردن لەخۆی، بە ئیسڕائیلی دەدات. کۆتایی بە قسەکانی هێنا و گوتی “ئازایەتی گەلی ئیسڕائیل سەرسوڕهێنەرە” و شانازی بەوەوە دەکات کە لەوێ بووە.
بنیامین ناتانیاهۆ کە لە سەرەتای کۆنگرەکەدا قسەی کرد. سوپاسی سەرۆکی ئەمریکای کرد، بۆ سەردانەکەی و “پشتگیریی بێچەندوچوونی لە ئیسڕائیل”.
هەروەها، ئاماژەی بەوە کرد، حەماس ژن و منداڵیان کوشتووە. “منداڵیان بە بەرچاوی دایک و باوکیانەوە کوشت و دایک و باوکیان بە بەرچاوەی منداڵەکانیانەوە کوشت”.
ناتانیاهۆ زیاتر گوتی “من هەموو ڕۆژێک پشتگیری ئێوەم بینیوە و قووڵی و فرەوانی هاوکاری کە لە سەرەتاوە هەمانە، ئاستێک لە هاوکاری کە بەڕاستی لە مێژووی هاوپەیمانییە گەورەکەی نێوان هەردوو گەلەکەماندا بێوێنەیە”.
“ئێمە ئەو پشتگیرییە لەو پەیامە ڕوونەدا دەبینین، کە ئێوە بۆ دوژمنەکانمان دەنێرن بۆ ئەوەی ئیرادەی ئێمە تاقی نەکەنەوە”، ناتانیاهۆ وای گوت.
ئەو، پێداگیری لەسەر “تێکشکاندن و لەناوبردنی حەماس” کردەوە.
