زێدپرێس
ئەمڕۆ دووشەم ٢٣ی تشرینی یەکەمی ٢٠٢٣، بەڕێوەبەرایەتی پۆلیسی دارستان و ژینگەی پارێزگای سلێمانی، ڕایگەیاند، مەفرەزەکانى بەشى پۆلیسى دارستانى شارەزوور، “لە پێناو پاراستن و پارێزگاریکردنى سنورەکەیان، دەرچونێکیان ئەنجامدا بۆ ناو قەزاى شارەزوور و توانیان ٤ هاووڵاتى دەستگیر بکەن، کە سەرقاڵى ڕاوکردن بوون.
ئاماژەی بەوە کردووە، هاوکات توانرا دەستبگیرێت بەسەر ٧ چۆلەکەى ڕاوکراو و چەکێکى بادى و ٢ پاکەت فیشەک و لایتێکی دەستی و ماتۆڕسکیلێک، کە لە ڕاوکردنەکەدا بەکارهێنراون.
بەڕێوەبەرایەتی پۆلیسی دارستان و ژینگەی پارێزگای سلێمانی، باس لەوە دەکات، “ئێستا هەندێک لە هاووڵاتییان بێبەزەییانە کەوتوونەتە ڕاوکردنى چەند باڵندەیەک و هەوڵى لەناوبردنیان دەدەن”. زیاتر دەڵێ “هەرچەندە مەفرەزەکانى پۆلیسى دارستان بەردەوام لە هەوڵ و ماندووبووندان بۆ ڕیگریکردن لە سەرپێچیکاران، بەڵام جێگەى نیگەرانییە هەندێک لە هاووڵاتییان سەرقاڵى ڕاوکردنن”.
لەبارەی ڕاوچییەکانیشەوە، بەڕێوەبەرایەتییەکە دەڵێ، پەڕاوی لێکۆڵینەوەیان بۆ ڕێکخراوە و ڕادەستی دادوەر کراوە بۆ وەرگرتنی ڕێکاری یاسایی.
ڕۆژی ٢٠ی تشرینی یەکەم، بەڕێوەبەرایەتی پۆلیسی دارستان و ژینگەی سلێمانی، دەستگیرکردنی ٣ هاووڵاتی ڕاگەیاند، کە لە سنوری تانجەڕۆ ٣٥ چۆلەکەیان ڕاوکردبوو.
