زێدپرێس
ئەمڕۆ شەممە، ٢٨ی تشرینی یەکەمی ٢٠٢٣، گرووپی ڕێکخراوەیی (دەنگی جوو بۆ ئاشتی) لە ئەمریکا، ڕایگەیاند، زیاتر لە ٣٠٠ خۆپیشاندەری جوو و پاڵپشتیکارانیان لەلایەن پۆلیسی وڵاتەکەوە دەستگیرکراون، لەکاتێکدا شەوی ڕابردوو گرووپەکە خۆپیشاندانێکی بەرفرەوانی لەناو گەورە وێستگەی شەمەندەفەری نیویۆرک لەپێناو پاڵپشتی لە گەلی فەڵەستین و دژبە سیاسەتی ئیسڕائیل بەڕێوەبرد.
خۆپیشاندەران، داوای دەستبەجێ ڕاگرتنی شەڕ و ئاگربەستیان لە کەرتی غەززەدا دەکرد.
دەنگی جوو بۆ ئاشتی، لەوەتەی شەڕی ئیسڕائیل و حەماسەوە، بەتوندی پاڵپشتی لە فەڵەستین دەکات و ڕۆژانە چالاکی مەدەنی لە شێوەی خۆپیشاندان لە شارە گەورەکانی ئەمریکا وەک واشنتن دی سی و نیویۆرک بەڕێوەدەبات. جگەلە کەسایەتییە جووەکان، سەدان و هەزاران موسڵمان و بەتایبەت فەڵەستینییەکانی نیشتەجێی ئەمریکا، لە چالاکییە مەدەنییەکانی گرووپەکەدا بەشدارن.
گرووپە ڕێکخراوەییەکە بەتوندی سەرکۆنەی دەسەڵاتدارێتی ئیسڕائیل دەکات لە پێوەندی لەگەڵ فەڵەستین و ڕاشکاوانە ڕایدەگەیەنێت، ئەوەی ئیسڕائیل دەیکات، بریتییە لە داگیرکاری و ئاپارتاید و شەڕی سەر غەززەیش بە کۆمەڵکوژی و جینۆساید پێناسە دەکەن.
