زێدپرێس
بەتۆمەتی دزینی دوو ئۆتۆمبێل، مەفرەزەكانی نووسینگەی نەهێشتنی دزینی ئۆتۆمبێل، تۆمەتبارێكیان دەستگیركرد.
بەڕێوەبەرایەتی پۆلیسی پارێزگای سلێمانی، ئەمڕۆ یەکشەم، ١٢ی تشرینی دووەمی ٢٠٢٣، ڕایگەیاند، پاش سکاڵای هاووڵاتییەک لەسەر دزینی ئۆتۆمبێلەکەی، هێزەکانی پۆلیس دەستیان بە لێکۆڵینەوە و بەدواداچوون کردووە و لەلایەن نووسینگەی نەهێشتنی دزینی ئۆتۆمبێلی سەر بە بەشی پۆلیسی نەهێشتنی تاوانەوە، تۆمەتبارەکە دەستگیر کراوە.
ئاشکرای کرد، لەکاتی دەستگیرکردنی تۆمەتباردا، دەست بەسەر ئۆتۆمبێلێکدا گیراوە و دوای لێکۆڵینەوەکان دەرکەوتووە، کە تۆمەتبار ئەو ئۆتۆمبێلەشی دزیوە و ئۆتۆمبێلەکەی دیکەی فرۆشتووە.
تۆمەتبارەکە بەناوی (م. و. ع) لەدایکبووی ساڵی ١٩٨٧ و ئێستا بە بڕیاری دادوەر و بەپێی ماددەی ٤٤٦ لە یاسای سزادانی عێراقی ڕاگیراوە و “لەكاتی لێكۆڵینەوەكانیشدا دانی ناوە بە دزینی هەردوو ئۆتۆمبێلەکەدا”، لە ڕاگەیەندراوەکەی پۆلیسدا هاتووە.
