زێدپرێس
ئەمڕۆ یەکشەم، ١٢ی تشرینی دووەمی ٢٠٢٣، پارێزگاری هەولێر، سەرۆکی شارەوانی و بەڕێوەبەری ئەندازەی پارک و باخچەکانی هەولێر، پێشوازیان لە کونسڵی گشتی چین لە هەرێمی کوردستان کرد.
بەگوێرەی ڕاگەیەندراوی بەڕێوەبەرایەتی ئەندازەی پارکەکانی هەولێر، کونسڵی گشتی چین، دووپاتی لە پەرەپێدانی پەیوەندییەکانی نێوان هەرێمی کوردستان و وڵاتەکەی لە هەموو بوارەکانی (بازرگانی، پیشەسازی، کشتوکاڵ و گەشتوگوزار) کردووەتەوە.
لە دیدارەکەدا، گفتوگۆ لەسەر پڕۆژەى درووستکردنى “پارکێکى گەورە” کرا، کە لەمنزیکانە بەدیزاێنێکى سەردەمییانە و لەسەر شێوازى چینى و بە ڕووبەرى ١٥ هەزار مەتر چوار گۆشە، لەلایەن کونسڵخانەی چینەوە لە شاری هەولێر درووست دەکرێت.
بەپێی ڕاگەیەندراوەکە، هەر لەو دیدارەدا، لەلایەن ئومێد خۆشناو، پارێزگاری هەولێرەوە، چەند شوێنێک بۆ درووستکردنی پارکەکە پێشنیاز کراوە؛ وێڕای سوپاسکردنی کونسڵخانەی چین لە بەرانبەر درووستکردنی پارکەکە و بەرزنرخاندنی، ڕایگەیاند، “(پارکەکە) لەداهاتوودا دەبێت بە یادگار و دیارییەکى جوانى وڵاتى چین بۆ هەولێرى پایتەخت، جگە لەوەى درووستکردنى ئەم پارکە دەبێت بە پاڵپشت و هاوکار بۆ ژینگەیەکى تەندروست و زیادکردنى ڕێژەى سەوزایی لە شارى هەولێر”.
