بەگوێرەی نووسراوی ژمارە ١١٠٠ی بەڕێوەبەرایەتی گشتی وەبەرهێنانی هەولێر سەربە دەستەی وەبەرهێنان، کە لە ڕێککەوتی ٢٥ی شوباتی ٢٠٢٤ دەرکراوە، هەر گرێبەستێکی کڕین و فرۆشتنی یەکەکانی نیشتەجێبوون ئەگەر لە بەڕێوەبەرایەتی گشتی وەبەرهێنان تۆمار و پەسندنەکرا بێت، بە پەسندنەکراو هەژمار دەکرێت.
لەوڕووەوە، بەڕێوەبەرایەتییەکە هۆشداری بە نووسینگەکانی کڕین و فرۆشتنی خانووبەرە دەدات، هەر مامەڵەیەک لە دەرەوەی ڕێکار و ڕێنمایی ئاماژەبۆکراو، کە بریتییە لە تۆمارکردن و پەسندکردنی گرێبەستی کڕین و فرۆشتن لە بەڕێوەبەرایەتی گشتی وەبەرهێنان، لێپرسینەوەی یاسایی لە دژ دەگیرێتەبەر.
لەلایەکی دیکە، هەر ئەمڕۆ چوارشەم، ٦ی ئازاری ٢٠٢٤، ژووری بازرگانی و پیشەسازی هەولێر، لە ڕاگەیەندراوێکدا نووسینگەکانی کڕین و فرۆشتنی خانووبەرە ئاگادار دەکاتەوە، کە پاڵپشت بە ناوەڕۆکی نووسراوی ژمارە ١٢ی وەزارەتی داد لە ڕێککەوتی ٨ی کانوونی دووەمی ٢٠٢٤، کڕین و فرۆشتن و هەر مامەڵەیەک بە زەویوزاری گشتی بەدەر لە یاسا قەدەغەیە و هەر نووسینگەیەک سەرپێچی بکات، ڕێکاری یاسایی لە بەرانبەر خاوەنەکەی لەبەردەگیرێت.
