دەقی ڕاگەیەندراوەکە:
بەداخەوە دیسان پرسی نەناردنی مووچەی فەرمانبەران و مامۆستا و خانەنشینانی هەرێمی کوردستان لەلایەن بەغداوە سەریهەڵداوە و بووە باس و پرسی خەڵک.
بڕیاری ڕاگرتنی مووچەی هەرێمی کوردستان لەلایەن بەغداوە بە هەر بیانوویەک بێت پێچەوانەی بنەماکانی دەستوور و بڕیاری دادگای باڵای فیدڕاڵییە کە نابێت بابەتی مووچە تێکەڵی کێشە و پرسە سیاسییەکان بکرێت.
بڕینی قووتی خەڵک کە مافی خۆیانە بۆ ژیان، تاوانێکی گەورەیە ئەوە جگە لەوەی مووچەخۆران تووشی دڵەڕاوکێ و ترس دەکات و کاریگەری گەورە لە بازاڕ و کاسبی هاووڵاتییان دەکات.
بەداخەوە لەکاتێکدا چەند ڕۆژێک ماوە بۆ جەژنی قوربانی پیرۆز لەبری ئەوەی بەغدا هەنگاوی تری هاویشتبا بۆ چارەسەری کێشەکان و دەبوو زووتر مووچە بنێرێت تاوەکوو خەڵک بۆ جەژن پێداویستییەکانیان دابین بکەن، کەچی بڕیاری نەناردنی مووچەیان دا و مووچەخۆرانیان هەناسە سارد کرد.
تێکەڵکردنی مووچەی هاووڵاتییان بەهەر پرسێکی تر کارێکی ڕێگە پێنەدراو و نادەستوورییە.
ئێمە داوا لە بەڕێز سەرۆک وەزیرانی حکوومەتی عێڕاقی فیدڕاڵ محەمەد شیاع سوودانی دەکەین هەرچی زووە مووچەی هاووڵاتییانی هەرێمی کوردستان بنێرن و بۆ چارەسەری کێشەکانیش هەوڵ بدەن بگەڕێنەوە بۆ سەر مێزی گفتوگۆ و دانوستاندن و پشتبەستن بە دەستوور و ڕێککەوتنەکان.
لەهەمان کاتدا داوا لە بەرپرسان و نوێنەرانی کوڕدستان لە بەغدا دەکەین هەموو هەوڵێکی دیپلۆماسی و دەستووری بگرنەبەر بۆ دابینکردنی مووچە و شایستەکانی هەرێمی کوردستان و ناردنی مووچە پێش جەژن چونکە چیتر فەرمانبەران بەرگەی ئەو سزایانە ناگرن کە بەرانبەریان دەکرێ و پێویستە بڕیار و قسەی جددی و یەکلاکەرەوە بکەن.
دەستەی سەربەخۆی مافی مرۆڤ لە هەرێمی کوردستان
٣٠ی ئایاری ٢٠٢٥
